தலைமை உத்தரவுக்கு காத்திருக்கிறோம்: மீண்டும் போரிட தயார்; விடுதலைப்புலிகள் அறிவிப்பு

 

 

 

 

கொழும்பு, மே. 24-

 

மீண்டும் போரிட தயாராக இருப்பதாக விடுதலைப்புலிகள் அறிவித்து உள்ளனர். யாழ்குடா பகுதியில் உள்ள விடுதலைப்புலிகள் 48 மணி நேரத்துக்குள் சரணடைய வேண்டும் என்று யாழ் மாவட்ட ராணுவ தளபதி கெடு விதித்து உள்ளார். இதற்கு பதில் அளித்த யாழ்ப்பாணம் பகுதி விடு தலைப்புலிகள் தளபதி வெற்றிக்குமரன் ஒரு அறிக்கை வெளியிட்டு உள்ளார்.
 

அதில் அவர் கூறியிருப்பதாவது:-

 

எங்கள் துப்பாக்கிகளை தற்காலிகமாக மவுனமாக்கி இருப்பது சரண் அடைவதற்கு அல்ல. உரிய நேரத்தில் தலைமையின் உத்தரவுக்காக காத்திருக்கிறோம்.

 

எங்கள் போராளிகள் என்றும் இல்லாத அளவுக்கு மிக உறுதியுடனும் போராட தயாராக இருக்கிறோம். சிங்கள ராணுவத்தின் பசப்பு வார்த்தைகளுக்கு நாங்கள் மயங்க மாட்டோம்.

 

சிங்கள ராணுவம் உளவியல் மற்றும் மறைமுக புலனாய்வு போரை பெரிய அளவில் தமிழக மக்கள் மீது கட்டவிழ்த்து விட்டுள்ளது. எனவே மக்கள் விழிப்புணர்வுடன் இருக்க வேண்டும்.

 

பயங்கரவாதத்தை அழிப்பதாக கூறி சுதந்திர போராட்ட அமைப்பான விடுதலைப்புலிகளை அழித்து விட்டதாக இலங்கை அரசு கூறி வருகிறது. இந்த மாயை மிக விரைவில் உடையும்.

 

இவ்வாறு அவர் கூறியுள்ளார்.

 

இதற்கிடையே மட்டக்களப்பு, திரிகோணமலை பகுதியில் சரண் அடைய முயற்சித்த விடுதலைப்புலிகள் பலரை ராணுவம் சுட்டு கொல்வதாக தகவல்கள் வெளியாகி உள்ளன