பிரபாகரனின் 2-வது மகன் பாலச்சந்திரன் எங்கே?

பிரபாகரனின் 2-வது மகன் பாலச்சந்திரன் எங்கே?

  

 

 

வவுனியா, மே. 27-

 

விடுதலைப்புலிகள் தலைவர் பிரபாகரன் கொல்லப்பட்டு விட்டதாக இலங்கை அரசு அறிவித்தது. அவருடைய மூத்த மகன் சார்லஸ் அந்தோணியும் போரில் பலியாகி விட்டதாக அறிவித்தனர். இந்த அறிவிப்பு வெளியான 2 நாட்கள் கழித்து இன்னொரு அதிர்ச்சி தகவல் இலங்கை ராணுவ தரப்பில் இருந்து வெளியானது.

 

அதில் பிரபாகரனின் மனைவி மதிவதனி, மகள் துவாரகா, இளைய மகன் பாலச்சந்திரன் ஆகியோரும் கொல்லப்பட்டு விட்டதாக கூறப்பட்டது.

 

ஆனால் இலங்கை அரசு இதை மறுத்தது. மதிவதனியும், மற்ற குழந்தைகளும் இறந்ததை எங்களால் உறுதி செய்ய முடியவில்லை என்று கூறினார்கள்.

 

எனவே மதிவதனியும் மற்ற 2 குழந்தைகளின் கதி என்ன என்பது மர்மமாக இருந்தது. அவர்கள் லண்டனில் பத்திரமாக இருப்பதாகவும் சில தகவல்கள் கூறின.

 

ஆனால் மதிவதனியும் மகள் துவாரகாவும் இறந்து விட்டதாக விடுதலைப்புலிகள் முன்னாள் தளபதி கருணா கூறி இருக்கிறார்.

 

இது பற்றி கருணா கூறும் போது கடைசி கட்ட சண்டை நடந்த போது மதிவதனியும், துவாரகாவும் சண்டை நடந்த இடத்தில் தான் இருந்தனர். எனவே இருவரும் உயிரிழந்து இருப்பார்கள் என்றார்.

 

ஆனால் கடைசி மகன் பாலசந்திரன் பற்றி எதுவும் தெரியவில்லை என்று கருணா கூறினார். விடுதலைப் புலிகள் சர்வதேச உளவுபிரிவு தலைவர் பத்மநாபனும் பாலச்சந்திரன் பற்றி எங்களுக்கு எதுவும் தெரியாது என தங்களிடம் தெரிவித்ததாகவும் கருணா கூறினார்.

 

எனவே பாலச்சந்திரன் உயிரோடு இருக்கிறாரா? என்பதில் முரண்பட்ட தகவல்கள் வந்து கொண்டிருக்கின்றன.