அமெரிக்காவுடன் உறவை முறிக்க வேண்டும்; முஸ்லிம் நாடுகளுக்கு பின்லேடன் எச்சரிக்கை

 

 

 

 

துபாய், ஜுன்.5-

முஸ்லிம்களுக்கு எதிராக செயல்படும் மேற்கத்திய நாடுகள் மீதான போர் தொடரும் என்றும் அந்த நாடுகளுடன் கூட்டு சேரும் முஸ்லிம் நாடுகள் அனைத்தும் அந்த உறவை முறிக்க வேண்டும் என்றும் சர்வதேச பயங்கரவாதி பின்லேடன் தெரிவித்துள்ளான்.

 

அமெரிக்க அதிபராக பதவியேற்றுள்ள ஒபாமா, முதன் முறையாக முஸ்லிம் நாட்டுக்கு பயணம் மேற்கொண்டுள்ளார். எகிப்து நாட்டுக்கு நேற்று சென்ற அவர், `அமெரிக்க வரலாற்றில் முஸ்லிம்களுக்கு பங்கு உண்டு. முஸ்லிம்களுக்கு அமெரிக்கா எதிரானது அல்ல. அமெரிக்காவுக்கும் முஸ்லிம் நாடுகளுக்கு இடையே புதிய தொடக்கம் ஏற்பட வேண்டும்' என்று பேசினார்.

 

இந்த சூழ்நிலையில், அல்-குவைதா தீவிரவாத இயக்க தலைவனும் சர்வதேச பயங்கரவாதியுமான பின்லேடன், `அல்-ஜசீரா' டி.வி.க்கு ஒரு கேசட் அனுப்பி உள்ளான். நேற்று முன்தினம் அனுப்பப்பட்ட அந்த கேசட், நேற்று இணைய தளத்தில் வெளியானது. அதில் பின்லேடன் கூறியிருப்பதாவது:-

 

மத நம்பிக்கையற்றவர்கள் மற்றும் அவர்களுடைய ஏஜெண்டுகளுக்கு (மேற்கத்திய நாடுகள்) எதிரான நீண்ட கால போர் தொடருகிறது. மதநம்பிக்கையற்ற உலகத்துக்கு எதிரான போரில் உங்களை தியாகம் செய்ய வாருங்கள். இஸ்லாத்தின் வெளிச்சத்தில் நாம் வாழ வேண்டும் அல்லது நம் கவுரவமாக இறக்க வேண்டும். முஸ்லிம்கள் மத்தியில் வெறுப்பு விதைகளை ஒபாமா விதைத்து வருகிறார்.

 

மத நம்பிக்கை இல்லாதவர்களுடன் ஒரு முஸ்லிம் கூட்டு சேர்ந்து கொண்டு அவர்களுக்கு பின்னால் நின்றபடி முஸ்லிம்களுக்கு எதிராக செயல்பட்டால் அவனுடைய இறை நம்பிக்கை செல்லாததாகி விடும். அவன் மத நம்பிக்கையற்ற, துரோகி ஆவான்.

 

ïதர்களுடனும், அமெரிக்கர்களுடனும் கூட்டு சேர வேண்டாம் என முஸ்லிம் நாடுகளை எச்சரிக்கிறேன். அமெரிக்க கொள்கைகளை அமல் படுத்துவதற்காக முஸ்லிம்கள் மீதே பாகிஸ்தான் ராணுவம் தாக்குதல் நடத்தி வருகிறது.

 

அமெரிக்காவுடன் பாகிஸ்தான் அதிபர் சர்தாரி கூட்டு சேர்ந்து கொண்டு முஸ்லிம்களுக்கு எதிராக போரிடுமாறு தனது ராணுவத்துக்கு உத்தரவிட்டுள்ளார். இஸ்லாம் மீது உண்மையான பற்று கொண்ட அனைவரும் இது போன்றவர்களுக்கு எதிராக போரிட வேண்டும்.

இவ்வாறு அந்த கேசட்டில் பின்லேடன் தெரிவித்துள்ளான்.