முகமது நபியை அவமதித்து பேசவில்லை: நடிகர் ஷாருக்கான் மறுப்பு

 

 

மும்பை, ஜூன். 20-

 

பிரபல இந்தி நடிகர் ஷாருக்கான் சமீபத்தில் ஒரு பத்திரிக்கைக்கு பேட்டி அளித்தார். அதில், அவர் முகமது நபி பற்றி கருத்து தெரிவித்து இருந்தார்.

வரலாற்றில் அவர் பெரிய அளவில் எந்த தாக்கத்தையும் ஏற்படுத்தவில்லை என கூறியிருந்தார். இதன் மூலம் முகமது நபியை அவமதித்ததாக ஷாருக்கான் மீது இஸ்லாமியர்களுக்கு கடும் கோபம் ஏற்பட்டது.

 

இது தொடர்பாக மும்பையில் உள்ள அமன் கமிட்டி பந்த்ரா போலீசில் ஷாருக்கான் மீது புகார் கொடுத்தது. இதையடுத்து மத ரீதியாக பேசி மக்கள் மனதை புண்படுத்தி விட்டதாக ஷாருக்கான் மீது பந்த்ரா போலீசார் வழக்குப்பதிவு செய்துள்ளனர்.

 

இதுபற்றிய தகவல் அமெரிக்காவில் இருக்கும் ஷாருக்கானுக்கு தெரிய வந்தது. உடனே அவர் இதற்கு மறுப்பு தெரிவித்துள்ளார்.

 

முஸ்லிம் ஆகிய நான் இஸ்லாம் கொள்கைகளுக்கு மிகவும் முக்கியத்துவம் கொடுத்து வருகிறேன். "முகமது நபி"யை பற்றி அவமதித்து கருத்து கூறவில்லை. தவறாக புரிந்து கொண்டு பத்திரிக்கையில் பிரசுரிக்கப்பட்டுள்ளது. எனவே சம்பந்தப்பட்ட பத்திரிக்கைக்கு எஸ்.எம்.எஸ். மூலம் விளக்கம் அனுப்பினேன். தங்களின் தவறை அப்பத்திரிக்கை ஏற்றுக்கொண்டுள்ளது.