பிரபாகரனும், பொட்டு அம்மான் கஞ்சிக்குடி காது என்ற அடர்ந்த காட்டுப் பகுதிக்குள் சென்று விட்டதாக சில தகவல்கள் தெரிவிக்கின்றன

பிரபாகரன் மரணம் மர்மம் நீடிக்கிறது; உயிருடன் இருப்பதாக விடுதலைப்புலிகள் அறிவிப்பு

Colombo புதன்கிழமை, 

 

 

 

 

விடுதலைப்புலிகள் தலைவர் பிரபாகரனை சுட்டு கொன்று விட்டதாக சிங்கள ராணுவம் அறிவித்தது. நேற்று முன்தினமே அறிவிப்பு வந்தாலும் நேற்று மதியம் வரை அவரது உடலை காட்டவில்லை. அதிபர் ராஜபக்சே நேற்று காலை பாராளுமன்றத்தில் உரை நிகழ்த்தினார். அப்போதும் பிரபாகரன் கொல்லப்பட்டது குறித்து எந்த தகவலும் தெரிவிக்க வில்லை.

 

எனவே பிரபாகரன் கொல்லப்பட்டது உண்மை தானா? என்ற சந்தேகம் எழுந்தது.

 

இதற்கிடையே பிரபாகரன் கொல்லப்படவில்லை அவர் நலமுடன் இருக்கிறார் என்று விடுதலைப்புலிகள் சர்வதேச தொடர்பாளர் பத்மநாபன் அறிவித்தார்.

 

எனவே பிரபாகரன் கொல்லப்பட்டாரா? இல்லை உயிருடன் இருக்கிறாரா? என்ற குழப்பம் நீடித்து கொண்டிருந்த நேரத்தில் பிரபாகரன் உடலை கண்டு பிடித்து விட்டதாக சிங்கள ராணுவம் அறிவித்தது.

 

கடைசி போர் பகுதியை ஒட்டியிருந்த நந்திகடல் என்ற கடல் கழிமுகத்தில் நீரில் பிரபாகரன் உடலை கண்டெடுத்தாக ராணுவம் கூறியது.

 

அந்த உடலை வீடியோ படம் எடுத்து காட்டினார்கள். புகைப்படங்களும் வெளியிடப்பட்டன. அந்த உடல் அச்சு அசல் பிரபாகரன் போலவே இருந்தது. பெரிய மீசையுடன் அப்போது தான் முகச்சவரம் செய்தது போல இருந்தது. கண்கள் நிலை குத்தி இருந்தன. இடது நெற்றி பொட்டில் துப்பாக்கி குண்டு துளைத்த பெரிய காயம் இருந்தது.

 

முகத்தை பார்த்தால் இது பிரபாகரன் தான் என்று எல்லோரும் சொல்லும் அளவுக்கு தெளிவாக இருந்தது.

 

ஆனால் இது பிரபாகரன் இல்லை. வேறு யாருடைய உடலையோ காட்டி பிரபாகரன் என்கிறார்கள் என்று விடுதலைப்புலிகள் ஆதரவு இணைய தளங்களில் செய்தி வெளிவந்துள்ளன.

 

விடுதலைப்புலிகள் சர்வதேச தொடர்பாளர் பத்மநாபன் இந்த படம் வெளிவந்த பிறகு அளித்த பேட்டியிலும், பிரபாகரன் உயிரோடு தான் இருக்கிறார் என்று கூறி உள்ளார்.
 

பிரபாகரன் இறந்து விட்டதாக சிங்கள ராணுவம் வெளியிட்ட அறிவிப்பிலேயே பல்வேறு முரண்பாடுகள் உள்ளன.

 

பிரபாகரன் இறந்து விட்டதாக முதலில் கடந்த 17-ந் தேதி செய்தி வெளியானது. ராணுவ தரப்பில் இருந்து தான் இந்த செய்தி வெளியிடப்பட்டதாக தகவல்கள் வெளியாகின. ஆனால் திடீரென இதை ராணுவ அதிகாரிகள் மறுத்தனர்.

 

அதன் பிறகு பிரபாகரன் கொல்லப்பட்டதாக 18-ந் தேதி மதியம் மீண்டும் செய்தி வெளியானது. இதை ராணுவ அதிகாரிகளே அறிவித்தனர்.

 

பிரபாகரனும், விடுதலைப்புலிகளின் மூத்த தலைவர்களும் போரில் தப்பி செல்ல முயன்ற போது ராக்கெட் வீசி கொன்ற தாகவும் பிரபாகரன் உள்பட அனைவர் உடலும் கருகி விட்டதாக ராணுவம் கூறியது.

 

ஆனால் கடைசி வரை உடலை காட்டவே இல்லை. நேற்று பிற்பகல் திடீரென பிரபாகரன் உடலை கண்டுபிடித்து விட்டதாக அறிவித்தனர். நந்தி கடலில் கழிமுக பகுதி தண்ணீருக்குள் உடல் கிடந்ததாக கூறினார்கள்.

 

முதலில் வேனில் சென்ற போது சுட்டு கொன்றதாகவும் அவரது உடல் அடையாளத்தெரியாத அளவுக்கு கருகி விட்டதாகவும் கூறினார்கள். ஆனால் நேற்று தண்ணீருக்குள் உடல் கிடந்ததாக தெரிவித்தனர். அந்த உடலில் தலையில் காயத்தை தவிர வேறு காயமும் இல்லை. உடல் தெளிவாக இருந்தது.

 

இப்படி ராணுவம் முன்னுக்கு பின் முரணாக கூறி தகவல்கள் முதலில் சந்தேகத்தை ஏற்படுத்தின. இப்போது அவர்கள் காட்டியுள்ள உடலும் பல்வேறு சந்தேகத்தை ஏற்படுத்துவதாக விடுதலைப்புலி ஆதரவு இணைய தளங்கள் கூறுகின்றன. இறந்த போன யாருடைய உடலையோ பிளாஸ்டிக் சர்ஜரி மூலம் பிரபாகரன் மாதிரி வடிவமைத்து அதை காட்டி வருவதாக அதில் கூறி உள்ளனர்.

 

அவர்கள் எழுப்பியுள்ள சந்தேகங்கள் வருமாறு:-

 

1. தலையின் மேல் பகுதியை காணவில்லை. அதை மறைத்து வைத்திருப்பது ஏன்?

 

2. பிரபாகரன் நாடியின் நடுவில் வெட்டு இருக்கும் அது ஏன் இல்லை.

 

3. முகம் அப்போது தான் சவரம் செய்தது போல இருக்கிறது. ராணுவம் சுடுவதற்கு முன்பு அப்போது தான் சவரம் செய்தாரா?

 

4. இவர்கள் காட்டிய உருவத்தில் ஒரு இடத்தில் காதை காணவில்லை. மற்றொரு காதும் பிரபாகரன் உண்மை காது தோற்றத்தில் இல்லை.

 

5. பிரபாகரன் மூக்கு தட்டையாக இருக்கும் ஆனால் இந்த உருவத்தில் மூக்கு கூர்மையாக உள்ளது.

 

6. கை மொத்தமாக இருக்கும். அதில் சப்பி உள்ளது.

 

7. இது தவிர பிரபாகரன் முகத்தில் இன்னும் சில அடையாளங்கள் உண்டு. அதை இப்போது நாங்கள் தெரிவிக்கமாட்டோம். அதை சொன்னால் அதையும் சரி செய்து படத்தை காட்டுவார்கள்.

 

8. பிரபாகரன் தப்பி செல்லும் போது கொன்றதாக கூறுகிறார்கள். தப்பி செல்லும் போது சீருடையுடன் செல்வார்? அடையாள அட்டையை உடன் எடுத்து செல்வாரா?

 

இப்படி பல்வேறு சந்தேகங்களை அதில் தெரிவித்து உள்ளனர்.

 

ஈழத்தமிழர் பாதுகாப்பு பேரவையின் தலைவரும், பிரபாகரனுக்கு நெருங்கிய நண்பருமான பழ.நெடுமாறனும் இந்த படத்தில் இருப்பது பிரபாகரன் அல்ல. பிரபாகரன் உயிரோடு தான் இருக்கிறார் என்றார்.

 

டைரக்டர் பாரதிராஜா கூறும் போது பிரபாகரனை நான் நேரில் பார்த்து உள்ளேன். டி.வி.யில் காட்டப்பட்டது பிரபாகரன் படம் அல்ல என்றார்.

 

பிரபாகரன் உடலை டி.என்.ஏ. சோதனை செய்து பார்த்ததில் இது அவரது உடல் தான் என்று உறுதியாகி இருப்பதாக சிங்கள ராணுவம் நேற்றே கூறியது. ஆனால் டி.என்.ஏ. சோதனையை மின்னல் வேகத்தில் நடத்த முடியாது. பிரபாகரனின் ரத்த மாதிரி ஏற்கனவே ராணுவத்திடம் இருந்தால் தான் இந்த சோதனையையே செய்ய முடியும் என்று ராஜீவ் காந்தி கொலை வழக்கை விசாரித்த முன்னாள் சி.பி.ஐ. அதிகாரி கார்த்திகேயன் கூறி இருக்கிறார்.

 

இப்படி பல்வேறு சந்தேகங்கள் கிளம்பி கொண்டே இருக்கின்றன.

 

இதற்கிடையே பிரபாகரனும், பொட்டு அம்மான் உள்ளிட்ட தளபதிகளும் முல்லைத்தீவு அருகே உள்ள கஞ்சிக்குடி காது என்ற அடர்ந்த காட்டுப் பகுதிக்குள் சென்று விட்டதாக சில தகவல்கள் தெரிவிக்கின்றன.